ਬਹੁਤਕਨੀਕੀ ਯੁਵਕ ਮੇਲਾ – 2025-26 ਦੇ ਦੂਸਰੇ ਦਿਨ ਦਾ ਸ਼ਾਨਦਾਰ ਆਯੋਜਨ-

ਅੰਮ੍ਰਿਤਸਰ, 12 ਨਵੰਬਰ-(ਡਾ. ਮਨਜੀਤ ਸਿੰਘ)- ਪੰਜਾਬ ਟੈਕਨੀਕਲ ਇੰਸਟੀਟਿਊਸ਼ਨਜ਼ ਸਪੋਰਟਸ (PTIS) ਵੱਲੋਂ ਗਵਰਨਮੈਂਟ ਪੋਲੀਟੈਕਨਿਕ ਕਾਲਜ, ਅੰਮ੍ਰਿਤਸਰ ਦੇ ਸਹਿਯੋਗ ਨਾਲ ਪੰਜਾਬ ਅੰਤਰ-ਬਹੁਤਕਨੀਕੀ ਯੁਵਕ ਮੇਲਾ – 2025-26 ਦੇ ਦੂਸਰੇ ਦਿਨ ਦਾ ਸ਼ਾਨਦਾਰ ਆਯੋਜਨ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ, ਅੰਮ੍ਰਿਤਸਰ ਦੇ ਦਸ਼ਮੇਸ਼ ਆਡੀਟੋਰੀਅਮ ਵਿੱਚ ਕੀਤਾ ਗਿਆ।
ਪ੍ਰੋਗਰਾਮ ਦੀ ਵਿਸ਼ੇਸ਼ ਅਗਵਾਈ ਪਰਮਬੀਰ ਸਿੰਘ ਮਤੇਵਾਲ, ਪ੍ਰਧਾਨ, ਪੀ.ਟੀ.ਆਈ.ਐਸ.; ਪ੍ਰਿੰਸੀਪਲ, ਦਵਿੰਦਰ ਸਿੰਘ ਭੱਟੀ; ਰਾਮ ਸਰੂਪ; ਅਤੇ ਅਮਨਪ੍ਰੀਤ ਸਿੰਘ ਵਲੋਂ ਕੀਤੀ ਗਈ। ਇਸ ਮੌਕੇ ਡਾ. ਸੁਸ਼ੀਲ ਮਿੱਤਲ, ਵਾਈਸ ਚਾਂਸਲਰ, ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ, ਜਲੰਧਰ ਨੇ ਮੁੱਖ ਅਤਿਥੀ ਵਜੋਂ ਹਾਜ਼ਰੀ ਭਰੀ। ਉਨ੍ਹਾਂ ਦੀ ਹਾਜ਼ਰੀ ਨੇ ਪ੍ਰੋਗਰਾਮ ਦੇ ਮਾਹੌਲ ਨੂੰ ਉਤਸ਼ਾਹ ਅਤੇ ਗੌਰਵ ਨਾਲ ਭਰ ਦਿੱਤਾ। ਸਮਾਗਮ ਦੌਰਾਨ ਅੰਮ੍ਰਿਤਸਰ ਇੰਪਰੂਵਮੈਂਟ ਟਰੱਸਟ ਦੇ ਚੇਅਰਮੈਨ ਸ. ਕਰਮਜੀਤ ਸਿੰਘ ਰਿੰਟੂ ਅਤੇ ਅੰਮ੍ਰਿਤਸਰ ਦੀ ਸੀਨੀਅਰ ਡਿਪਟੀ ਮੇਅਰ ਸ੍ਰੀਮਤੀ ਪ੍ਰਿਅੰਕਾ ਸ਼ਰਮਾ ਵੀ ਮੌਜੂਦ ਸਨ।
ਇਹ ਯੂਥ ਫੈਸਟੀਵਲ ਹਰ ਸਾਲ ਪੰਜਾਬ ਦੇ ਵੱਖ–ਵੱਖ ਬਹੁਤਕਨੀਕੀ ਕਾਲਜਾਂ ਦੇ ਵਿਦਿਆਰਥੀਆਂ ਨੂੰ ਆਪਣੀ ਪ੍ਰਤਿਭਾ ਤੇ ਸੱਭਿਆਚਾਰਕ ਵਿਰਾਸਤ ਨੂੰ ਪੇਸ਼ ਕਰਨ ਦਾ ਮੌਕਾ ਦਿੰਦਾ ਹੈ। ਯੁਵਕ ਮੇਲਾ 2025–26 ਦੇ ਸੰਸਕਰਣ ਵਿੱਚ ਵਿਦਿਆਰਥੀਆਂ ਨੇ ਪੰਜਾਬੀ ਲੋਕ ਸੱਭਿਆਚਾਰ, ਕਲਾ ਤੇ ਰਚਨਾਤਮਕਤਾ ਦਾ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ।
ਦਸ਼ਮੇਸ਼ ਆਡੀਟੋਰੀਅਮ ਫੁੱਲਾਂ, ਬੈਨਰਾਂ ਅਤੇ ਲਾਈਟਾਂ ਨਾਲ ਸੁਸ਼ੋਭਿਤ ਕੀਤਾ ਗਿਆ ਸੀ। ਪ੍ਰੋਗਰਾਮ ਦੀ ਸ਼ੁਰੂਆਤ ਡਾ. ਸੁਸ਼ੀਲ ਮਿੱਤਲ, ਵਾਈਸ ਚਾਂਸਲਰ, ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ, ਜਲੰਧਰ; ਪਰਮਬੀਰ ਸਿੰਘ ਮਤੇਵਾਲ, ਪ੍ਰਧਾਨ, ਪੀ.ਟੀ.ਆਈ.ਐਸ.; ਪ੍ਰਿੰਸੀਪਲ, ਦਵਿੰਦਰ ਸਿੰਘ ਭੱਟੀ; ਹੋਰ ਪ੍ਰਿੰਸੀਪਲ ਸਾਹਿਬਾਨ ਅਤੇ ਅਤਿਥੀਆਂ ਵਲੋਂ ਸ਼ਮਾ ਰੋਸ਼ਨ ਕਰਕੇ ਕੀਤੀ ਗਈ, ਜੋ ਗਿਆਨ ਅਤੇ ਆਤਮਿਕ ਪ੍ਰਕਾਸ਼ ਦਾ ਪ੍ਰਤੀਕ ਹੈ।
ਮੁੱਖ ਅਤਿਥੀ ਡਾ. ਸੁਸ਼ੀਲ ਮਿੱਤਲ, ਵਾਈਸ ਚਾਂਸਲਰ, ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ, ਜਲੰਧਰ ਨੇ ਆਪਣੇ ਸੰਬੋਧਨ ਵਿੱਚ ਕਿਹਾ ਕਿ ਪੰਜਾਬ ਦੇ ਨੌਜਵਾਨਾਂ ਵਿੱਚ ਬੇਹੱਦ ਪ੍ਰਤਿਭਾ ਹੈ ਅਤੇ ਪੀ.ਟੀ.ਆਈ.ਐਸ. ਵੱਲੋਂ ਇਸ ਤਰ੍ਹਾਂ ਦੇ ਯੂਥ ਫੈਸਟੀਵਲ ਵਿਦਿਆਰਥੀਆਂ ਨੂੰ ਸੱਭਿਆਚਾਰਕ ਪਹਚਾਨ ਨਾਲ ਜੋੜਦੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਸਿੱਖਿਆ ਸਿਰਫ ਕਿਤਾਬਾਂ ਤੱਕ ਸੀਮਿਤ ਨਹੀਂ ਰਹਿਣੀ ਚਾਹੀਦੀ — ਇਹ ਸਰੀਰਕ, ਮਾਨਸਿਕ ਅਤੇ ਆਤਮਿਕ ਵਿਕਾਸ ਦਾ ਸਾਧਨ ਹੋਣਾ ਚਾਹੀਦਾ ਹੈ।
ਸ. ਕਰਮਜੀਤ ਸਿੰਘ ਰਿੰਟੂ ਨੇ ਕਿਹਾ ਕਿ ਵਿਦਿਆਰਥੀਆਂ ਦੇ ਕੁਲ ਵਿਕਾਸ ਲਈ ਸੱਭਿਆਚਾਰਕ ਗਤੀਵਿਧੀਆਂ ਵੀ ਜ਼ਰੂਰੀ ਹਨ। ਪਰਮਬੀਰ ਸਿੰਘ ਮਤੇਵਾਲ ਨੇ ਕਿਹਾ ਕਿ ਪੀ.ਟੀ.ਆਈ.ਐਸ. ਦਾ ਉਦੇਸ਼ ਵਿਦਿਆਰਥੀਆਂ ਨੂੰ ਸਿਰਫ ਟੈਕਨੀਕਲ ਹੀ ਨਹੀਂ, ਸੱਭਿਆਚਾਰਕ ਤੌਰ ਤੇ ਵੀ ਮਜ਼ਬੂਤ ਬਣਾਉਣਾ ਹੈ।
ਉਹਨਾਂ ਨਾਲ ਇਹ ਵੀ ਕਿਹਾ ਕਿ ਜੋ ਵਿਦਿਆਰਥੀ ਮੰਚ ’ਤੇ ਆਉਂਦਾ ਹੈ ਉਹ ਪਹਿਲਾਂ ਹੀ ਜੇਤੂ ਹੈ। ਪ੍ਰਿੰਸੀਪਲ ਦਵਿੰਦਰ ਸਿੰਘ ਭੱਟੀ ਨੇ ਵਿਭਾਗ ਅਤੇ ਸਾਰੇ ਆਯੋਜਕਾਂ ਦਾ ਧੰਨਵਾਦ ਕੀਤਾ, ਜਿਨ੍ਹਾਂ ਨੇ ਇਸ ਸਮਾਰੋਹ ਨੂੰ ਸਫਲ ਬਣਾਉਣ ਲਈ ਯੋਗਦਾਨ ਦਿੱਤਾ।
ਇਸ ਯੁਵਕ ਮੇਲੇ ਦੌਰਾਨ ਵੱਖ-ਵੱਖ ਕਾਲਜਾਂ ਦੇ ਪ੍ਰਿੰਸੀਪਲ, ਮੁਖੀ ਵਿਭਾਗ, ਅਧਿਆਪਕ ਅਤੇ ਵਿਦਿਆਰਥੀ ਵੱਡੀ ਗਿਣਤੀ ਵਿੱਚ ਸ਼ਾਮਲ ਹੋਏ। ਸੂਬੇ ਦੇ ਸਰਕਾਰੀ ਅਤੇ ਨਿੱਜੀ ਬਹੁਤਕਨੀਕੀ ਕਾਲਜਾਂ ਦੇ ਵਿਦਿਆਰਥੀਆਂ ਨੇ ਉਤਸ਼ਾਹ ਨਾਲ ਹਿੱਸਾ ਲਿਆ। ਇਸ ਮੌਕੇ ਪ੍ਰਿੰਸੀਪਲ ਸੁਖਵਿੰਦਰ ਸਿੰਘ ਰਾਣਾ, ਸੁਰੇਸ਼ ਕੁਮਾਰ, ਡਾ.ਨਵਨੀਤ ਵਾਲੀਆ ਅਤੇ ਰਕਸ਼ਾ ਕਿਰਨ; ਯਸ਼ ਕੁਮਾਰ ਪਠਾਣੀਆ, ਸਾਬਕਾ ਜਥੇਬੰਦਕ ਸਕੱਤਰ ਪੀ.ਟੀ.ਆਈ.ਐਸ.; ਹਰਿੰਦਰਜੀਤ ਸਿੰਘ ਮਰੋਕ, ਸਾਬਕਾ ਪਿ੍ੰਸੀਪਲ ਅਤੇ ਆਦਿਤਿਆ ਮਦਾਨ, ਚੀਫ਼ ਲੇਜ਼ਨ ਅਫ਼ਸਰ, ਆਈ.ਆਈ.ਟੀ. ਰੋਪੜ ਮੌਜੂਦ ਰਹੇ।
ਸੱਭਿਆਚਾਰਕ ਮੁਕਾਬਲਿਆਂ ਵਿੱਚ ਲੋਕ ਗੀਤ (ਲੜਕੇ), ਲੋਕ ਗੀਤ (ਲੜਕੀਆਂ) ਅਤੇ ਭੰਗੜਾ ਸ਼ਾਮਲ ਸਨ। ਹਰ ਪ੍ਰਦਰਸ਼ਨ ਨੇ ਦਰਸ਼ਕਾਂ ਦਾ ਦਿਲ ਜਿੱਤ ਲਿਆ। ਇਹਨਾਂ ਤਿੰਨਾਂ ਮੁਕਾਬਲਿਆਂ ਵਿੱਚ ਜੇਤੂਆਂ ਨੂੰ ਟ੍ਰਾਫੀਆਂ ਤੇ ਸਰਟੀਫਿਕੇਟ ਸ. ਕਰਮਜੀਤ ਸਿੰਘ ਰਿੰਟੂ ਅਤੇ ਸ੍ਰੀਮਤੀ ਪ੍ਰਿਅੰਕਾ ਸ਼ਰਮਾ ਵੱਲੋਂ ਦਿੱਤੇ ਗਏ। ਭੰਗੜੇ ਨੇ ਪੰਜਾਬੀ ਧਰਤੀ ਦੀ ਜੋਸ਼ੀਲੀ ਰੂਹ ਪੇਸ਼ ਕੀਤੀ।
ਪ੍ਰਿੰਸੀਪਲ ਦਵਿੰਦਰ ਸਿੰਘ ਭੱਟੀ ਨੇ ਸਭ ਦਾ ਧੰਨਵਾਦ ਕਰਦੇ ਹੋਏ ਕਿਹਾ ਕਿ ਇਸ ਸਮਾਰੋਹ ਨੇ ਵਿਦਿਆਰਥੀਆਂ ਵਿੱਚ ਭਰੋਸਾ, ਭਾਈਚਾਰਾ ਅਤੇ ਰਚਨਾਤਮਕਤਾ ਪੈਦਾ ਕੀਤੀ ਹੈ। ਨਾਲ ਇਹ ਵੀ ਕਿਹਾ ਕਿ “ਇਹ ਫੈਸਟੀਵਲ ਸਿਰਫ ਜਿੱਤਣ ਦਾ ਨਹੀਂ, ਸਿੱਖਣ ਅਤੇ ਇਕਤਾ ਦਾ ਪ੍ਰਤੀਕ ਹੈ। ਪੰਜਾਬ ਦਾ ਭਵਿੱਖ ਇਹ ਨੌਜਵਾਨ ਹੀ ਤੈਅ ਕਰਨਗੇ।” ਇਸ ਯੂਥ ਫੈਸਟੀਵਲ ਨੇ ਇਹ ਸਾਬਤ ਕੀਤਾ ਕਿ ਪੰਜਾਬ ਦੇ ਟੈਕਨੀਕਲ ਵਿਦਿਆਰਥੀ ਸਿਰਫ ਵਿਦਿਆ ਦੇ ਖੇਤਰ ਵਿੱਚ ਹੀ ਨਹੀਂ, ਸੱਭਿਆਚਾਰਕ ਪਾਸੇ ਵਿੱਚ ਵੀ ਅੱਗੇ ਹਨ।