ਕਿਸਾਨ ਨਹਿਰੀ ਪਾਣੀਆਂ ਨੂੰ ਤਰਸੇ- ਗੁਰਬਚਨ ਸਿੰਘ ਚੱਬਾ

ਤਰਨਤਾਰਨ,  23 ਜੂਨ- ਕਿਸਾਨ ਮਜ਼ਦੂਰ ਸੰਘਰਸ਼ ਕਮੇਟੀ ਪੰਜਾਬ ਵੱਲੋਂ ਕਿਸਾਨ ਆਗੂ ਨਿਰਵੈਲ ਸਿੰਘ ਨਿਸ਼ਾਨ ਬਲਦੇਵ ਸਿੰਘ ਦੀ ਅਗਵਾਈ ਹੇਠ ਅੱਜ ਪਿੰਡ ਚੱਬਾ ਵਿਖੇ ਰਾਜਬਾਹ ਝਬਾਲ ਵਿੱਚ ਨਹਿਰੀ ਪਾਣੀ ਨਾਂ ਆਉਣ ਕਾਰਨ ਪੰਜਾਬ ਸਰਕਾਰ ਵੱਲੋਂ ਨਹਿਰੀ ਪਾਣੀ ਟੇਲਾਂ ਤੱਕ ਤੇ ਕੱਲ੍ਹੇ ਕੱਲ੍ਹੇ ਖੇਤ ਤੱਕ ਪਹੁੰਚਾਉਣ ਦੇ ਕੀਤੇ ਗਏ ਦਾਅਵੇ ਦੀ ਪੋਲ ਖੋਲ੍ਹਦਿਆਂ ਕਿਹਾ ਕਿ ਅੱਜ 23 ਜੂਨ ਤੱਕ ਪਾਣੀ ਦੀ ਇੱਕ ਬੂੰਦ ਵੀ ਨਹੀਂ ਛੱਡੀ ।

ਕਿਸਾਨ ਆਗੂ ਗੁਰਬਚਨ ਸਿੰਘ ਚੱਬਾ ਨੇ ਕਿਹਾ ਕਿ ਪੇਡੀ ਸੀਜਨ ਦੌਰਾਨ ਸੂਆ ਪੁੱਟ ਕੇ ਪੱਕਾ ਕਰਨ ਦੇ ਨਾਂ ਤੇ ਉਸਾਰੀ ਸ਼ੁਰੂ ਕਰ ਦਿੱਤੀ ਗਈ ਜਿਸ ਨਾਲ ਹਨੇਰੀ ਝੱਖੜ ਕਾਰਨ ਬਿਜਲੀ ਸਪਲਾਈ ਪ੍ਰਭਾਵਿਤ ਹੋਣ ਨਾਲ ਕਿਸਾਨਾਂ ਨੂੰ ਕਾਫ਼ੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ ਅਤੇ ਜਰਨਰੇਟਰ ਦਾ ਪ੍ਰਬੰਧ ਕਰਕੇ ਮਹਿੰਗੇ ਭਾਅ ਦਾ ਡੀਜ਼ਲ ਬਾਲ ਕੇ ਲੱਗੇ ਝੋਨੇ ਨੂੰ ਬਚਾਉਣ ਲਈ ਪ੍ਰਬੰਧ ਕਰਨੇ ਪਏ, ਦੂਜੇ ਪਾਸੇ ਪੰਜਾਬ ਸਰਕਾਰ ਕਿਸਾਨਾਂ ਨੂੰ 1 ਜੂਨ ਨੂੰ ਝੋਨਾ ਲਾਉਣ ਲਈ ਕਹਿ ਰਹੀ ਸੀ ਪਰ 23 ਜੂਨ ਤੱਕ ਪਾਣੀ ਦਾ ਪ੍ਰਬੰਧ ਨਹੀਂ ਕੀਤਾ ਗਿਆ। ਡੈਮਾਂ ਵਿੱਚ ਪਾਣੀ ਨੱਕਾ ਨੱਕ ਭਰਿਆ ਪਿਆ ਹੈ ਜਦੋਕਿ ਪੰਜਾਬ ਤੇ ਹਰਿਆਣਾ ਨੂੰ ਪਾਣੀ ਵੱਧ ਵਰਤਣ ਲਈ ਕਿਹਾ ਜਾ ਰਿਹਾ।

ਇਸ ਮੌਕੇ ਕਿਸਾਨਾਂ ਨੇ ਪੰਜਾਬ ਸਰਕਾਰ ਦੇ ਖ਼ਿਲਾਫ਼ ਨਾਅਰੇਬਾਜੀ ਕਰਦਿਆਂ ਕਿਹਾ ਕਿ ਪੈਡੀ ਸੀਜ਼ਨ ਨੂੰ ਧਿਆਨ ‘ਚ ਰੱਖਦਿਆਂ ਤੁਰੰਤ ਪਾਣੀ ਛੱਡਿਆ ਜਾਵੇ । ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਦਰਸ਼ਨ ਸਿੰਘ ਲਾਡੀ ਸਿੰਘ ਫੌਜੀ ਨਿਰਮਲ ਸਿੰਘ ਦਿਲਬਾਗ ਸਿੰਘ ਬਲਵਿੰਦਰ ਸਿੰਘ ਬਾਊ ਹਰਜੀਤ ਸਿੰਘ ਜੀਤਾ ਜਗਪ੍ਰੀਤ ਸਿੰਘ ਜਗ ਭੁਪਿੰਦਰ ਸਿੰਘ ਭਿੰਦਾ ਦਿਲਸ਼ੇਰ ਸਿੰਘ ਹਰਭਾਲ ਸਿੰਘ ਹਰਜੀਤ ਸਿੰਘ ਜੀਤੂ ਮਲਕੀਤ ਸਿੰਘ ਸਮੇਤ ਹੋਰ ਕਿਸਾਨ ਹਾਜ਼ਰ ਸਨ।